JALA

Quranda jala (ásirese ar-namysqa jala jabý, zınamen aıyptaý) úlken kúnálardyń biri retinde atalady jáne naqty dálel keltirmese mindetti jaýapkershilikke tartylý kerektigi kórsetilgen. Osylaısha Quranda jalanyń jazasy belgilengen. Jalanyń Quranda kórsetilgen jazasy – 80 dúre soǵý jáne odan keıin jala jabýshynyń kýágerligin áste qabyl etpeý, ıaǵnı senimsiz adam retinde esepke alý. Sondaı-aq aıattyń sońynda olar pasyq retinde atalǵan. Nur súresi, 4-aıat.

Mine, bul jala jabýǵa mindetti túrde quqyqtyq shara qoldaný kerektigin bildiredi.

Jalaǵa qatysty atalmysh súreniń kelesi aıatynda: «Eger táýbe etip, odan keıin túzetý jasasa, ol basqasha ekeni, Allanyń onyń qateligin keshiretini» aıtylǵan. Nur súresi, 5-aıat.

Jala – aq adamdy qara, kinásiz adamdy qylmysty boldyrý jáne adam abyroıyn tógý, quqyǵyn taptaý, aqysyn jeý áreketi. Sondyqtan qandaı bir adamǵa qatysty aqparattyń aq-qarasyn ajyratpastan, istiń mán-jaıy anyqtalmastan ilip alyp, ony taratý da jala jabý sanalady. Mine, jala aıta salý, jaba salý, tarata salý jeńil bolǵanymen, jaýapkershiligi, kúnási aýyr is.

Jolaman BULAN