TÚŃILME! (Ǵıbratty áńgime)

Árbir juma kúni ımam men onyń 11 jastaǵy uly «Jumaqqa jol» degen atpen daıyndalǵan kitapsha taratady eken. Osyndaı kúnderdiń birinde tosynnan kún sýytyp, qatty jaýyn jaýady. Barynsha jyly kıingen uly: «Áke, men daıynmyn!» dedi.

– Balam, búgin aýa-raıy máz emes. Úıde qalǵanymyz durys bolar. Men áli tolyqtaı saýyqpadym,-deıdi ákesi.

– Olaı bolsa, men jalǵyz barsam bola ma?

– Árıne, qulynym. Asa Meıirimdi Allanyń atymen!,-degen ákesi ulynyń qolyna juqa kitapshalardy ustatty.

Máz bolǵan balasy:

– Raqmet, sizge Allanyń sálemi bolsyn!,-dedi de úıden shyǵyp ketti.

Búldirshin jasynyń kishiligine qaramastan beıtanys adamdarmen erkin sóılesip, qolyndaǵy qaǵazdaryn taratýǵa kiristi. Qolaısyz aýa-raıynda qarasy kóringen halyq ta az edi. Bir saǵat ótkennen keıin ǵana qolyndaǵy kitapshalar taýsylýǵa jaqyndady. Sońǵy kitapshany bermek bolyp, ary-beri júgirse de, eshkimdi taba almaıdy. Oılana kele, eń birinshi kezdesetin úıdiń qońyraýyn basaıyn degen sheshimge keledi.

Bala esik qońyraýyn basty, alaıda eshkim ashpady. Ol taǵy da, az ýaqyttan keıin taǵy da basty. Jaýap joq. Úmitin úzip, ketýge yńǵaılandy. Bir-eki qadam basqannan keıin qaıta burylyp, esik qońyraýyna qol sozdy. Bul joly esik aqyryn ǵana ashyldy.

Tabaldyryqtan jasy úlken áıel kórindi. Kóńil-kúıi joq eken...

– Balaqaı, men saǵan kómektese alamyn ba?,-dedi. Bala onyń kózine meıirimmen qarady da, kúlimsiredi:

– Mazalaǵanym úshin keshirińizshi. Men Alla Taǵalanyń sizdi jaqsy kóretinin jáne sizge qamqor ekenin aıtqym kelgen. Myna kitapty usynaıyn dep esik qaǵyp edim. Siz bul kitapsha arqyly Alla Taǵalamen jaqynyraq tanysyp, ómirdiń mánin túsinýge múmkindik alasyz.

Áıel álsiz únmen:

– Raqmet saǵan, balam,-dedi...

Bir aptadan keıin, ımam jergilikti meshitte dáris oqıdy. Aıaqtaǵannan keıin: «Sizderde suraq bar ma? Nemese aıtarlaryńyz bolsa, márhabbat?» deıdi.

Sonda áıelder bólmesi jaqtan daýys shyqty:

«Siz meni tanymaısyz. Men buryn sońdy munda kelmedim. Tipti, ótken jumaǵa deıin musylman da emes edim. Islam týraly eshteńe bilmeıtinmin. Mundaı jaǵdaıǵa tap bolamyn dep eshqashan oılamappyn! Birneshe aı buryn joldasym qaıtys bolyp, jalǵyz qaldym. Ótken juma kún aýa-raıy kúrt ózgerip, salqyn tústi, aspan túnerip, naızaǵaı oınap, jańbyr jaýdy. Kóńilim onan saıyn qulazyp, ózime qol jumsamaq oı keldi. Meniń sanamdy «Ómirdiń máni joq» degen oı bılep aldy. Arqan alyp, ekinshi qabatqa kóterildim. Oryndyqqa shyǵyp, bir ushyn úı tóbesindegi bórenege baıladym da, ilmekti moınyma saldym. Ózimdi sondaı jalǵyz, eshkimge kereksiz sezindim de, oryndyqtan sekirýge daıyn turdym. Kenet esik qońyraýy basyldy. Az ǵana kúteıin, biraq ashpaımyn dep sheshtim. Qońyraý taǵy da, taǵy da basyldy. «Bul kim eken? Meniń esigimdi qaǵatyn eshkim joq edi ǵoı» degen oı keldi. Oryndyqan túsip, dálizge shyqtym, esikti ashqanda kóz aldymda kúlimsiregen, júzi nurly bala turdy. Búldirshinniń sózderi júregimdi jibitip jiberdi: «Men Alla Taǵalanyń sizdi jaqsy kóretinin jáne sizge qamqor ekenin aıtqym kelgen» dep qolyma «Jumaqqa jol» dep jazylǵan kitapshany usyndy da, ketip qaldy. Oryndyqqa otyrdym da, álgi kitapshadaǵy árbir sózdi muqııat oqýǵa kiristim. Keıinnen joǵary kóterilip, oryndyq pen arqandy jınap tastadym. Endi olar maǵan kerek emes.

Minekı, sizder meni aman-saý ári baqytty qalpymda kórip tursyzdar. Aqıqatqa júregimdi ashqan Allaǵa sansyz maqtaýlar bolsyn! Meshit mekenjaıy kitapsha artynda kórsetilgen soń, osynda keldim. Sizderge ómirimdi ózgertken oqıǵany aıtyp, Alla Taǵala der kezinde jibergen balaqaıǵa da alǵys bildirsem deımin!»

Áıeldiń áńgimesin estigende kózine jas almaǵan adam bolmady. Ákesi ulynyń janyna keldi de, qapsyra qushaqtap, mańdaıynan súıdi. Jáne Alla Taǵalaǵa salıqaly urpaq úshin sansyz shúkirlikter men maqtaýlar aıtýmen boldy.

Qandaı ǵıbratty oqıǵa! Alla Taǵala siz ben bizge ıman degen uly baılyǵyn syılady, al biz kelesi bir adamnyń baqyt tabýyna sebepshi bolýymyz múmkin eken! Bar bolǵany bir-eki aýyz sóz jáne izgi nıet...

Kelesi bir alar ǵıbratymyz – sabyrlyq qasıetin serik etý. Álemniń burysh-buryshynda bir sáttik qıyndyq, bir mezettik synaq, jalǵyzdyq úshin arqanǵa qol sozatyndar qatary kóbeıip keledi. Alaıda, aqıqat jáne Allaǵa, aqyretke degen senim kez kelgen qıyndyqqa tótep berýge kúsh berip, baqytty ǵumyr negizine aınalady. Ómirde bolǵan bul oqıǵa osy kisilerge sabaq bolsa eken deımiz jáne Alladan týra jol berýin suraımyz!