TOIYMSYZDYQ – QOǴAMNYŃ QULDYRAÝY
Áttegen-aıy búginde baılyq pen ataqqa degen toıymsyzdyq kúnnen kúnge artyp keledi. Quddy bir adamdar ózara qymbat kólik, brend kıimder, záýlim úıler salyp, jarysyp jatqandaı. Árıne, áleýmettik jaǵdaıymyzdyń jaqsarǵanyna qýanasyń, biraq kóbi kredıt alyp, kótere almaıtyn shoqpardy beline baılap, qaryzǵa belshesinen batyp jatyr. Oǵan myna derekter dálel: árbir qazaqstandyqtyń basyna shaqqanda bankterden 950 000 teńge bereshegi bar. Jalpy, qaryz 18 trıllıondy quraıdy. Sonda 20 mln turǵynnyń 8 400 000-dk qaryzy bar. Al, esebine jete berińiz. Damý ma bul, quldyraý ma?
Osylaısha, ishki tynyshtyq pen rýhanı baılyqtan alystap, turaqsyzdyqqa urynady.
Bul – birinshiden qundylyqtardyń álsireýinen týyndap otyrǵan dert. Toıymsyzdyq adam boıyndaǵy meıirimdilik pen shynaıylyqty álsiretedi. Bireý qolyndaǵy barǵa shúkir etpeı, únemi odan da kópti qalasa, aınalasyndaǵylarmen básekelesip, ózinen tómenderdi elemeýi múmkin.
Ekinshiden, áleýmettik ádiletsizdikten. Iaǵnı kóptegen adamdar adal eńbekpen emes, ońaı jolmen baılyqqa jetýdi armandaıdy. Tanymal adamdar sııaqty bolýdy qalap, tez baıýǵa umtylady. Bul maqsatqa jetý úshin jalǵan utys oıyndary men shemalardy oılap tabý, ózge adamdardy aldap, tez baıyp ketýge tyrysýshylyq paıda bolady.
Birneshe jetistikke jetken adam odan da kópke umtylady. Ómirdiń shynaıy maqsaty baılyqta emes ekenin umytyp, ishki úılesim men tynyshtyqtan alystap ketedi. Bul adamdy sheksiz jarysqa túsirip, rýhanı qundylyqtardan alystatady.
Sondyqtan qoǵam retinde toıymsyzdyqty toqtatyp, qanaǵat pen rýhanı baılyqqa qaıta oralýymyz kerek. Ómirdegi shynaıy baqyt materıaldyq ıgilikterde emes, ishki tynyshtyq pen ózara syılastyqta ekenin túsinsek, biz turaqtylyqqa, adamgershilikke qol jetkize alamyz.
