TÁKÁPPAR DÚNIE-AI
Taqyrypqa shyǵarǵan keıisimdi qysqa qaıyraıynshy. Boks degen jekpe-jek sportynyń óz erejesi bar, kúres degen sporttyń da óz erejesi bar, fýtbol, basketbol, voleıbol oıyndarynyń da óz erejesi bar. Qandaı bir sport alańyna aıaq bastyń ba, sol oıynnyń erejesimen áreket etesiń. Birine-birin aralastyra almaısyń.
Jalpy, tirshiliktegi qaısybir sala bolmasyn onyń qalyptasqan teorııalyq-metodologııalyq negizderi bolady. Osy taqylettes musylmandardyń da taǵdyr týrasynda ornyqqan aqıda erejesi bar. Oǵan basqa "erejelerdi" aralastyra almaımyz.
Alaıda aralastyratyndar bar, olar "MEN ISLAMMEN JÚRMEIMIN" deıtinder. Nemese óziniń óresi mýqalıd deńgeıinde ekenin sezinbesten, mýjtahıdtiń hám mýtakállımniń isine aýyz salatyn saryaýyz (ǵylymnyń ısi murnyna barmaıtyn) balapandar birdi-birge uryp, el ishin alataıdaı búldirip jatady. Artynan kómekke "anany" shaqyryp, "mynany" shaqyryp, ájik-kújik áńgime aıtyp, aqtalyp álek bolady.
Al, qaýashaǵynda sháınam mıy bar adam jaza basqanyn túsinip, jalma-jan jańylǵanyn moıyndap, táýbege keler edi. Tákáppar dúnıe-aı deseńshi...
