ShÁKÁRIM: KÁRILIK TÝRALY...

Bar bolsa bilim,

Sen sóıle, tálim,

Jan menen dene birinde.

Oılasań kóńil,

Ózińe jeńil,

Qaıratyń qalyń kúninde.

Jas kóńilde jaryq bar,

Káride kemdik anyq bar.

Ne shyqpas jastan,

Qaıtpaıdy tastan,

Izdenýge kúshiń bar.

Saırandap júrip,

Sansyzdy bilip,

Qalypsyz, qyzyq isiń bar.

Jastyqtan qyzyq is bolmas,

Káride aqyl, kúsh bolmas.

Qaıratyń qalyp,

Aqyldan tanyp,

Kárilik kelse basyńa,

Qádiriń ketip,

Zamanyń ótip,

Jan jýymas qasyńa.

Kárilik degen jumys bar,

Artynda taıaý bir is bar...

Azaıyp kúshiń,

Saýdyrap tisiń,

Shalbardaı bolyp bet ketse,

Dalaǵa baryp sıe almaı,

Kıimiń jóndep kıe almaı.

Qýaryp murtyń,

Sýalyp urtyń,

Túzdegi qý bas jaqtanyp.

Tura almaı jatyp,

Bylshyldap, shatyp,

Ótken kúndi aıtyp maqtanyp.

Jaryǵyń óship kóńilden,

Kárilik jaman ólimnen.

Qyzaryp kóziń,

Ezilip sóziń,

Jastyǵyń túsip oıyńa.

Iekpen shaınap,

Tilińmen aıdap,

Jegen as juqpaı boıyńa.

Et jegen saıyn qaqalyp

Az ólimge taqalyp.

Búgilip beliń,

Taýsylyp áliń,

Aıaq pen beliń qurysyp.

"Kári ıtim, shat" - dep,

"Sóılemeı jat" - dep,

Qatynyń ketse urysyp.

Ólmegenge qara jer,

Onan da óziń bara ber.

Qaıǵy emes qaza,

Bolmaımyn naza,

Noqtaly basqa bir ólim.

Shal bolmaı- aqóleıik,

Alla isine kóneıik.

Qyzýsyz tániń,

Sezimsiz janyń

Bolady kárilik belgisi.

Ony da sezbeı,

Úmitin úzbeı,

Kelmeıdi shaldyń ólgisi.

Alpystan ári barmańdar,

Ańdamaı shal bop qalmańdar!

ShÁKÁRIM qajy