RÝHANI JOL NEMESE ALLAǴA APARATYN JOL NEDEN BASTALADY?

«Balaqaı, Allaǵa jetetin jol – kóp sóıleýde de, qur sózben aıtýda da emes, júrektiń shynaıylyǵynda.

Eger Rabbyńa jaqyndaǵyń kelse, júregińdi adamdarǵa táýeldilikten tazart, ishki dúnıeńdi dúnıege baılanýdan bosat, bar oıyń men maqsatyń tek Alla bolsyn.

Balaqaı, júrek – bir ydys sııaqty. Eger ol dúnıeqońyzdyqpen tolsa, Allany eske alýǵa oryn qalmaıdy. Al eger ol bos bolsa, onda Allanyń nurymen tolady. Sondyqtan júregiń tek Allaǵa baılansyn. Óıtkeni júrek dúnıege baılanyp qalsa – sharshaıdy, al Allaǵa baılanyp qalsa – tynyshtyqpen rahat tabady.

Balaqaı, paqyr bolýdan qoryqpa, kerisinshe, ǵapyldyqtan (Allany umytýdan) qoryq. Sebebi paqyrlyq adamdy Allaǵa jaqyndatady, al ǵapyldyq alystatady. Eger Allaǵa jaqyndaǵyń kelse, óz nápsińdi Onyń aldynda kishireıt ári paqyr bol (tákappar bolma). Óıtkeni Alla kishipeıil, synǵan júrekti jaqsy kóredi.

Esińde bolsyn, Allaǵa aparatyn jol táýbeden bastalady, sosyn shynaıylyq, odan keıin yqylas, keıin mahabbat keledi. Al mahabbat júrekke kirse, adam úshin bul dúnıede Alladan artyq esh nárse bolmaıdy.»

(Derek kóz: Ál-Fathýr Rabbanıı

Hazireti Abdýlqadır Jılanı (q.s.)

***

Rýhanı jol nemese allaǵa aparatyn jol neden bastalady?

Ol — ózińe ózińniń ıttigińdi moıyndaýdan bastalady. Tarqatyp aıtatyn bolsaq, adam óziniń ekijúzdiligin, dúnıeqońyzdyǵyn, ataqqumarlyǵyn, ózin aqtaýyn, qorqaqtyǵyn, ótirikshi beınesin, sózinde turmaıtyndyǵyn, jylpystyǵyn, ishitarlyǵyn, bireýdiń jetistigine shynaıy qýana almaıtyn beıshara sorlylyǵyn, nápsisi beınelep bergen jalǵan keremet “mendi” ózine shynaıy túrde moıyndamaı, ol adamda shynaıy quldyq hal eshqashan oıanbaıdy jáne shynaıy táýbe júzege aspaıdy. Sebebi ózine shynaıy moıyndaý — nápsisi beınelegen jalǵan “keremet tulǵany” qulatyp, jalǵan “mennen” shynaıy “menge” jol ashady.

Áýlıelerimiz aıtady: bul dúnıedegi jamandyqtyń kóbi bılikten emes, moıyndamaýdan bastalady. Adam óziniń qateleskenin moıyndaǵysy kelmeıdi, sol kishkentaı ǵana joqqa shyǵarýdan úlken «buzaqylyq» (فساد) ósip shyǵady. Tákapparlyq ony qateligin qorǵaýǵa ıtermeleıdi, keıin aqtaıdy, sosyn sonyń aınalasyna bútin bir júıe quryp alady. Bir ǵana shynaıy moıyndaýmen bitýi múmkin nárse, aqyry uzaqqa sozylǵan zııanǵa aınalady.

Tarıh muny talaı ret kórsetken. Uly ımperııalar tek syrtqy jaýdan emes, ishki soqyrlyqtan qulaǵan. Ózin-ózi tym joǵary qoıatyn basshylar tyńdaýdy qoıdy, túzelýdi qoıdy, qyrsyqtyqty kúsh dep oılady.

Qatelikti moıyndaý — álsizdik emes. Kerisinshe, ol qorǵan. Óz-ózin erterek túzegen adam keıingi úlken quldyraýdan aman qalady.

Bul maqala eki avtordyń qosyndysy. Sheıh Hamza Iýsýf (h.a.)

Bekzhan AZHIMOV fb paraqshasynan