QARTTYQ— ÁLSIZDIK EMES, NÁZIKTIK

Jas ulǵaıǵan saıyn adam aǵzasy názik tartatynyn túsingendeımiz. Burynǵydaı lapyldaýdan qalyp, sabyr men salmaq ıekteı beredi me deımin. Alaıda muny álsizdik demes edim. Bul – tabıǵattyń adamǵa: "ózińdi aıala" deıtin ymy bolsa kerek.

Jas kezde kózge ilmegen bolmashy aýyrsyný egde tartqanda búkil júıkeńe taraıtyn syrqatqa aınalatynyn der kezinde elep-eskere bermeıtinimiz ras qoı.

Keshe ǵana sergek sezingen jan búgin ornynan turýǵa erinetinin baıqaǵanda birtúrli oılanyp qalady ekensiń. Kóńil – jas, al tánniń óz zańy bar. Ol sol zańmen ómir súredi.

Tán – bizge Jaratýshydan jetken amanat. Ol tozatyn, sharshaıtyn, tynyshtyq tileıtin tiri mehanızm.

Jas kelgende densaýlyqqa kútim tek em-dommen shektelmeıtini taǵy bar. Jan men tánniń tynyshtyǵy, tynysh uıqy, taza aýa, kóńilge aýyr sóz darytpaý, jandy jaralaıtyn aqparatqa shekteý qoıý, artyq salmaqtan saqtaný, qarapaıym jattyǵý, ómirdiń kishkentaı qýanyshtaryna da shúkirshilik etý, ózińe tym qatal bolmaý - bári densaýlyq kepili.

Keıde biz aýyrǵan jerimizdi ǵana emdeımiz. Biraq jas kelgende deneni túgeldeı kútý – sanaly ustanymǵa aınalsa quba-qup.

Dáriger – qajetti sátte keńes berýshi. Al eń úlken emshi – ózimizge degen janashyrlyq.

Sol janashyrlyq bolmaǵan jerde qymbat dári de kómektese almaıdy desem senesizder me?

Kún saıyn ózińizge bir jaqsylyq jasańyz: taza sý ishińiz, serýenge shyǵyńyz, tereń tynys alyńyz, jaqsy kitap oqyńyz, jaqsy ortamen aralasyńyz, rýhanı azyq alyńyz. Sonda tánińiz de, janyńyz da sizge rıza.

Qarttyq – qorqynyshty kezeń emes. Qarttyq – eger oǵan danalyqpen qarap, tánińizben dostasa bilseńiz, tipti eń tynysh, eń tereń, eń baqytty kezeńge aınalady.

Gúlmárııa BARMANBEKOVA