NÁPSINIŃ PENDENI BASQARA BASTAÝY

Jaratylǵan quldar nápsilerin óz ýysynda ustaýy úshin, Alla Taǵala myna bir keńesti berdi: «...Al endi jaratýshylaryńa táýbe qylyńdar. ári ózderińdi túzetińder. (Nemese qylmystylardy óltirińder)...» (2:54).

Bul dertten qutylýdyń eń jaqsy amaly – qajetsiz, bos nárelerden bas tartý, bar jan-tánimen Alla Taǵalaǵa umtylý ári ózin tolyqtaı Onyń qalaýyna berý. Alla Taǵala Ibrahımnen (ǵ.s.) uly Ismaıldy (ǵ.s.) qurbandyqqa shalýdy buıyrǵanda Ol paıǵambardyń (ǵ.s.) boıusynýshylyǵyn teksergisi keldi. Al paıǵambar (ǵ.s.) bolsa Jaratýshyǵa tolyqtaı boıusynǵandyǵyn kórsetip synaqtan súrinbeı ótti: «Sóıtip ekeýi de unap, ákesi ony mańdaıynyń ústine jatqyzady. Biz, oǵan: “Áı Ybyraıym!”,- dep, dybystadyq. “Ras túsińdi shynǵa shyǵardyń. Kúdiksiz izgi is istegenderdi osylaısha synaımyz” (dedik)» (37:103-105).

 Osydan keıin Alla Taǵala Ibrahımge (ǵ.s.) ulynyń ornyna qurbandyq shalsyn dep úlken bir qoıdy násip etti. Jýnaıd Bagdadı bylaı aıtqan: «Kimde-kim bul dúnıemen baılanysyn saqtasa, oǵan Alla  Taǵala Jumaqty tyıym saldy». Birde Muhammad ıbn Abdýlla ar-Razı Ábý ál-Kasym ál-Mısrıdiń bylaı aıtqanyn keltirgen: «Ibn Iazdanııardan: «Alla Taǵalaǵa quly qandaı nıetpen umtylýy kerek?» - dep suraǵanda, ol bylaı jaýap bergen eken: «Alla razylyǵy úshin bas tartqan nárselerine tipti de burylyp qaramaıtyndaı ári ózi qutylǵan jaman qylyqtaryna budan bylaı qaıtyp oralmaıtyndaı nıetpen umtylýy kerek».

Osy jaýaptan keıin odan: «Bul sózińiz kúnálaryna táýbe etken kúnaharlarǵa qatysty. Al álsiz ımany bar adam Allaǵa qalaı umtylýy kerek?» - dep suraǵanda ǵalym: «Ótkendegi sátsizdikteri men basqa túsken kúıinishterine boı aldyrmaı, júregimen keleshek haliniń keremettigin sezine otyryp umtylýy kerek», - dep jaýap bergen eken.