Namazym qaza boldy (2-bólim)
Birneshe jyl boıy sol qarapaıym jumysshyny kórip júrmin – júzinen kúlki ketpeıdi. Oǵan kózim túsken saıyn, júregime bir tynyshtyq ornaıdy. Onyń beınesi maǵan únemi erekshe bir kúsh, jaǵymdy áser syılaıtyn.
Azan daýysy estile sala, ol dúkenin dereý jabady da, asyqpaı, sabyrmen meshitke qaraı bet alady. Sırek te bolsa, men meshitke barǵan sátterimde onyń dáret alyp, únsiz ǵana qabyrǵa janyna jaıǵasyp, azan men qamat arasyndaǵy ýaqytta namaz oqyp otyrǵanyn baıqaıtynmyn. Biraq bul jaı ǵana namaz emes edi — bul Allaǵa degen mahabbattyń únsiz kórinisi, tereń súıispenshilikpen ótetin rýhanı kúı edi. Onyń oqyǵan namazynan shyqqan álsiz ǵana ún, júrek túbinen shyqqan syr sekildi estilip, meniń de ishki jan dúnıemdi oıatyp, ári qyzyǵýshylyq, ári qyzǵanysh sezimin týdyrdy..."
Ol namazyna sonshalyq berilip ketken edi — aınalasynda eshkim joqtaı, eshnárse kórmeıtindeı kúıde otyratyn. Typ-tynysh, sheksiz sabyr men tynyshtyq ústinde, júregimen berile qulshylyq qylatyn. Onyń bir ǵana rakaǵat namaz oqýy — ózgelerdiń tórt rakaǵatpen ótkizetin ýaqytyna tatıtyn. Uzaq turyp, uzaq ıilip, eki sájdeniń arasyndaǵy otyrysty da asyqpaı, muqııat atqaratyn.
Kóńilimde bir suraq týyndady: «Ol ne aıtyp tur? Álde ol kópshilik bilmeıtin zikirlerdi bile me?» Onyń namazyn unattym. Sol sekildi yqylaspen, sabyrmen qulshylyq etkim keldi. Biraq isteı almadym. Bul men oılaǵandaı ońaı emes eken. Nege ekenin ózim de túsine almadym — kóp uzamaı taýsylyp, baıaǵy qalpyma qaıta oraldym. Bir namazdan soń ekinshi namazdy ótkizip alatyn boldym...
Jyldar boıy osyndaı adamdardy syrttaı baqylap júrdim. Ishteı ózimdi mazalaǵan bir suraq únemi maza bermeıtin: Nelikten keıbir adamdar namazǵa sonshalyq beriledi, al basqalar bir ýaqyt namaz oqýdyń ózin qıyn kóredi? Munyń syry nede? Bul Allanyń qalaǵan qulyna ǵana beretin nyǵmeti me? Eger solaı bolsa, onda nege biz birinshi bolyp namaz úshin suralatynymyz jaıly eskertilgen? Eger bul bizdiń qolymyzdan kelmeıtin, tek Qudaıdyń erkinde ǵana bolatyn is bolsa, onda ne úshin ol úshin saýap ta, jaza da bar?
Osy suraqtar meni kóp oılandyrdy. Sondyqtan jaýap izdeýge bel býdym. "Men myna ómirmen qosh aıtysyp, artyma sanaýly ǵana rakaǵat qaldyrýym múmkin" degen oı mazamdy qashyrdy, júregime salmaq saldy. Osylaısha men ómirinde namazdy ótkizip alýy sırek kezdesetin adamdarmen sóılesip, olardyń syryn bilgim keldi. Sonymen qatar, jalpy ómirde tabysqa jetken adamdardyń ómirbaıandaryn, ádetteri men ustanymdaryn zerttedim. Sonda bir baıqaǵanym — naǵyz tabysty adamdar men namazdy berik ustanatyn jandardyń arasynda kóp uqsastyq bar eken. Ekeýinde de tártip, maqsat, tabandylyq pen ishki senim basym.
Mine, men osy joldardy óz keńsemde otyryp, bir kese kofemdi raqattana iship otyryp jazyp otyrmyn. Tańymdy ýaqytynda oqylǵan tań namazymen qarsy aldym. Bul ádet — meniń ómirimdegi eń úlken betburystyń bastaýy boldy. (Jalǵasy bar...)
«Fátátnı Sola» / Aýdarǵan Ersaıyn Qabylqanuly, «Áziret Sultan» meshitiniń naıb ımamy
