HÁZIRETI SIRRI SAKATI
Birde Sakatı ýaǵyz aıtyp otyrǵanynda, ony tyńdaýǵa barlyq sán-saltanatymen halıf kelipti. Sol kezde Sakatı:
“Búkil jaratylystardyń ishinde eń asyly adam balasy, ol Qudaıdyń eń súıiktisi bola tura, qanshama kúná isteıdi,”-deıdi. Saraıyna oralǵan halıf Qudaıdan qoryqqanynan túndi uıqysyz ótkizedi. Kelesi kúni ol jyltyraq shapapnyn tastap, ıyǵyna jamylǵysyn orap, dárýishter qusap, Sakatıge kelip ótinish jasady. Halıf ýaǵyzyńdy tyńdaǵan soń dúnıe isterinen bas tartyp, ońashalana bergim keledi, rýhanı tez jetiletin joldy aıt dedi. Sırrı Sakatı oǵan tek eki jol bar: onyń bireýi Kıeli Kitapta kórsetilgen. Ol boıynsha únemi Quran aıattaryn oqyp, ony qaıtalap otyrady, kúnine bes ýaqyt namaz oqıdy, kedeı-kepshikke zeket-sadaqasyn beredi, t.b. dinı amaldar jasaıdy. Ekinshi jol qysqaraq jáne áldeqaıda paıdaly: barlyq dúnıe isinen bas tartyp, ýaqytynyń bárin ǵıbadatqa arnaý, basqalardan eshnárse suramaý, adamdardan eshteńe almaý, Qudaı basqa salǵan nárselerdi qabyldamaý jáne duǵa jasap, qajetin tek bir Alladan ǵana suraý.
Bul nasıhatty tyńdaǵan halıf shól dalaǵa ketip qaldy. Biraz kúnnen soń halıftyń anasy Sakatıge kelip, onyń sózderin estigen uly dárýishke aınalyp ketkenin, qazir onyń qaıda ekenin eshkim bilmeıdi,-dep shaǵym aıtty. Sakatı ol kisige ýaıymdamańyz, ol aman-esen oralady dep jubatty.
Biraz ýaqyttan soń halıf-dárýish Sakatıge kelgeninde ol bir shákirtin halıftyń anasyna, áıeli men bala-shaǵasyn shaqyrtýǵa jiberdi. Halıfty kórgen olar otbasyńa oral dep jalbarynyp jylady. Ol áńgimeden bas tartyp, ketpek boldy. Áıeli sol kezde oǵan ulyńdy ózińmen birge alyp ket dedi. Halıf ulynyń ústindegi baı kıimin sheship, ony jún kıimge kıindirdi. Ulynyń myna hálin kórgen áıeli ony aıap ketip, ulyn qaıtyp ózi aldy da, úsheýi saraıyna oraldy, al halıf - taýǵa qaraı ketti. Birneshe kúnnen soń Sakatıge bir adam kelip, kóp uzamaı halıf-dárýish óledi, sondyqtan sizdi shaqyrýda dedi. Sakatı mazarǵa barǵanynda, jerde jatqan halıf-dárýishti kóredi. Sakatı onyń janyna jerge otyryp, onyń basyn kóterdi. Halıf oǵan:
“Sál keshigip qaldyń,”-dedi da Qudaıdyń esimin aýzyna alyp, júrip ketti. Sakatı ony jerleýge qajetti zattardy alyp kelmek bop, aýylǵa qaraı attandy. Oǵan qarama-qarsy pálenbaı adam kele jatyr eken. Olar qabirge qaraı asyǵys kele jatyr, qoldarynda jerleýge qajetti saımandary bar. Olar Sakatıge Qudaıdyń Áýezi bizge mazarǵa baryp, qazir ǵana dúnıeden ótken Meniń eń súıikti dosymdy jerleńder dep tapsyrdy dep túsindirdi.
Farıddın Attardyń "Tazkırat ýl-aýlmıa" kitabynan
aýdarǵan Júrsin Kárim
