BAÝYRJAN MOMYShULY: NEMEREŃNIŃ ATYN ÓZGERT. NE BYLAPYT TILIŃDI TYI!

Tús mezgili. Dastarqan basynda as iship otyrǵanbyz. Osy kezde álgi apa balkonnan nemeresin óz daǵdysymen shaqyra bastady. Atanyń bólmesi páterimizdiń túpkir tusyna ornalasqandyqtan myna jaqtaǵy daýys estile qoımaıtyn. Búgin qas qylǵandaı týra ata as iship jatqanda, qyryndaý ashyq qalǵan balkon esiginen ana kisiniń ár sózi anyq estildi. Bir sózdiń salmaǵy bir sózge túsip qulaqty túrshiktirdi:

— Abaı! Aý, Abaı! Áı, qańǵybas Abaı! Oı, júgermek Abaı! Úıge kir deımin! Oı…

Men baryp balkon esigin jaba qoıdym, biraq odan paıda shamaly. Ata qolyndaǵy qasyǵyn ústel ústine tars etkizip tastaı salyp, ornynan shuǵyl kóterildi de:

— Myna ıdıottyń jaǵyn qarystyrý kerek, — dedi tisterin shyqyrlatyp.

Baqytjan ákesiniń ushqyndap kele jatqan ashýynan seskenip:

— Papa, papa, toqtashy, onyń qaıdan aıǵaılap jatqanyn aldymen bilip alaıyq ta, — dep ózinshe basý aıtpaq boldy. Ata oqty kózimen bizdi bir sholyp, tamaǵyn shala qaldyryp asúıden shyǵyp ketti.

— Mundaı da bádik adam bolady eken-aý! Biraq papam onyń jaǵyn qalaı qarystyrmaqshy eken? — dedi Bákeń.

Onyń reti ertesinde op-ońaı kele qaldy. Ata Jazýshylar odaǵyna bir jumyspen barmaqshy bolyp taksı shaqyrtty. Ádettegideı papkasyn kóterip qasyna ilestim. Biz syrtqy esikten shyqqanda qalqadaǵy uzyn oryndyqta Aqysh áje men álgi apa otyr eken. Ata Aqysh ájeni kóre salyp, sálemdesý úshin buryla bergende men aqyryn ǵana:

— Ata, balkonnan aıǵaılaıtyn kisi otyr, — dep «satyp» jiberdim.

Ata taıaǵyn silteı, shıraq basyp baryp Aqysh ájemen sálemdesti de, ana apaǵa tónip kelip:

— Abaı degen balanyń ájesi sensiń be? — dep zildene zirk etti. Áıel adamǵa «sen» dep sóılemeıtin ádeti bul joly jaıyna qaldy.

— I-ı-ıá! — dep tutyǵyp zorǵa jaýap qatty álgi apa.

— Ne nemereńniń atyn ózgert, ne bylapyt tilińdi tyı! Óıtpeıdi ekensiń atyp tastaımyn! — dep salaly qolynyń suq saýsaǵyn týra kózine bezedi de, kilt burylyp: «Júr!» — dep maǵan buıyrdy. Ketip bara jatyp Aqysh ájeniń kózinen rızashylyqty baıqadym, ana áıeldiń kógergen júzin kórdim. Sol kúnnen keıin baqyraýyq apanyń dymy óshti, pyshaq keskendeı tyıyldy. Mezgilsiz marqum bolǵysy kelmedi bilem, kópke barmaı ózi de ketip tyndy.

Zeınep AHMETOVA “Kúretamyr” kitabynan alyndy.