BÁRI KESh BOLMAI TURǴANDA…
Kishkentaıyńda teledıdardyń aldyna jatyp alyp uıyqtap qalasyń.
Anań basyń qısaıyp jatyr dep jastyq qoıyp ketedi.
Bilmeısiń, baıqamaısyń.
Qazir óz balań uıyqtap qalǵanda – dál solaı jastyqty túzep qoıasyń.
Sonda ǵana túsinesiń…
Bir dosyńmen aralaspaı ketesiń.
“Aldymen ózi jazsyn, men nege ıile berýim kerek?” deısiń.
Kóp uzamaı onyń paraqshasynda qara ramka paıda bolady…
Sonda ǵana bári kesh ekenin túsinesiń.
Keı adamdar ómirińnen únsiz ketedi.
Naqty sebep joq.
Jáı ǵana habarlaspaı ketkensiń.
Kósheden kórip qalasyń — ekeýiń de jymııasyńdar, biraq amandaspaısyńdar.
Sebebi bir kezderi tym jaqyn bolǵansyńdar…
Baýyrlaryńmen de dál solaı alystap ketýiń múmkin.
Baıaǵyda birge ósken, birge kúlgen adamdar endi salqyn.
Sebep te joq – bir kezde bireýi jazbaı ketti, bir kezde ekinshisi renjip qaldy.
Endi eshkim eshkimge birinshi bolyp jazbaıdy.
Sóıtip, týystyq tek “aty” ǵana qalady…
Ýaqytymen aıtylmaǵan “keshir”, “jaqsy kórem”, “saǵyndym” degen sózder – keıin saǵan tastaı batyp, júregińde qala beredi.
Sen bárin úlgerem dep oılaısyń.
Jaqsy kóretin adamdar máńgi janymda sııaqty kórinedi.
Biraq bir kúni… jáı ǵana “keshir” dep aıta almaı qalýyń múmkin.
Sondyqtan:
– Renjisseń de, keshir.
– Qımasań – habarlas.
– Saǵynsań – aıt.
– Kúni erteń bárin aıtqyń kelgenmen… eshkim qalmaýy múmkin.
Osy jazbany oqyp bitirgen soń, uzaq úndemeı ketken bir adamǵa jaı ǵana “qalaısyń?” dep jaz. Keıde bári – sol bir habardan bastalady.
Gúljanar Nesipbekqyzynyń paraqshasynan
