«BARǴAN SOŃ KÓREMIZ» DEGENDERDIŃ KÓBI BARYP QOIDY ... (mysal áńgime)
Bir mysal áńgime bar edi. Kóldegi balyqtardyń arasynda kóp jasaǵan kónekóz, káriqulaq bir qarııasy bopty. Sol qarııa qarttyq jetip, ajal jaqyndaǵanda, óziniń kindiginen taraǵan úrim-butaqtary men óren-jarandaryn jıyp baquldasypty. Sóziniń sońyn mynandaı ósıetpen aıaqtapty:
«Balalarym, bizdiń ómir súrip jatqan jerimiz – bul dúnıe. Mynaý sýdyń ústinde o dúnıe degen ómir bar. Ol jaqta tik júretin, eki jaǵynda eki salbyraǵy (qoldary), tóbesinde domalaq basy bar bir maqulyqtar ómir súredi. Ózderi óte aılaker keledi. Olar sender jaqsy kóretin jándikterdi úshkir temirlerdiń ushyna shanshyp qoıady. Biraq, sender olarǵa aldanbańdar! Jeımiz dep umtylyp júrmeńder. Al, eger, ashqaraqtanyp bas salsańdar, qurydyńdar! Onda senderdi joǵary qaraı tartyp áketedi. Olardyń tórt buryshty bop keletin úıleri bar. Sol úılerde álgindeı maqulyqtardyń urǵashylary bolady. Olary tipti jaman! Qoldarynda jarq-jurq etken ótkir temirleri bolady. Sol temirlerimen qaryndaryńdy aqtaryp salady. Ústerińdegi jalt-jult etken teńgelerińdi qyrnap tastaıdy. Sonan soń, áppaq bir untaqqa aýnatady. Odan keıin shyjyldap qaınap jatqan maıǵa tastap, ári-beri ábden kúıdiredi. Sonan soń, súıekterińniń qaıda qalǵanyn, etterińniń qaıda ketkenderin eshkim bilmeıdi…” dep entigip baryp toqtady.
Bul sózderdi tyńdap otyrǵandardyń bári shoshyp, jandary túrshikti…
Kóp uzamaı qarııa balyq ómirden ótti. Bir kúni bir top jas balyqtar serýendep kele jatyp, qarmaq ushyna ilingen shylaýshanǵa kezdesedi.
Ushqalaqtaý biri shylaýshanǵa umtyla bergende, ekinshi biri:
«Toqtańdar, mynaý áneýkúngi atam aıtqan nárse ǵoı. Jaqyndamaıyq!» deıdi.
Biraq, eligip alǵan ushqalaq shabaq:
«Óı, ol aljyǵan atamnyń ertegisi edi ǵoı. O dúnıeni kim kórip keldi deısiń? Sen de ne bolsa soǵan senip… Qazir men mynany jeımin. Sonan soń, o dúnıe bolsa,ol jaqtan óz kózimmen kórip kelgenderimdi jyrdaı ǵyp senderge aıtyp beremin!» dep, shylaýshanǵa aýyz salyp qalǵanda, temir qarmaqqa qaqaldy da qaldy.
Baıqus balyq oıynnan ot shyqqanyn túsingen kezde bári de kesh edi. Ári-beri bulqynyp kórip edi, tússiz arqan typyr etkizbeı, joǵary qaraı súıreı jóneldi. Sodan, sol balyq aınadaı jarqyraǵan aıaýly aıdynyna qaıta oralmady.
Qaısybir qurdastary «bálkim kelip qalar, o dúnıeniń jaǵdaıyn maıyn tamyzyp turyp aıtyp berer» dep áli de kútip júr deıdi…
Odan beri talaı adamdar da kóz kórmegen álemge sapar shekti. «Barǵan soń kóremiz» degenderdiń kóbi baryp qoıdy baratyn jaqtaryna. Olar endi kóretinderin kórip jatyr. Biraq, olar, ókinishke oraı, ne kórgenderin bizge aıta almaıdy. Al, biz kimniń qandaı halde ekenin dál bilmegenmen, qandaı sıpattaǵy adamdardyń nendeı jaǵdaıda bolatynyn ózimizge túsirilgen Kitap pen Alla Elshisiniń (Oǵan Allanyń ıgiligi men sálemi bolsyn) aıtqandary arqyly jaqsy bilemiz.
Qalǵan ómirimizdi sharıǵat belgilep bergen zańdarǵa sáıkes súrsek, Jabbar Iemizdiń ýáde etken jaqsylyqtaryna qol jetkizermiz dep úmittenemiz. Biraq, jańaǵy balyq sııaqty, dindi ertek sanap júrgender aqyldaryn durys istetse eken, Qubylaǵa qarap, bizbenen birge bir sapta turyp namaz oqysa dep armandaımyz ǵoı baıaǵy…
Serik QALIEV
