«ÁHL-SÚNNET» DEGEN KIMDER?
Qalaǵan pendesin keńshiligi men ıgiligi arqyly týra jolǵa baǵyttap, qalaǵan pendelerin asqan jomarttyǵymen aǵyl-tegil jaqsylyqqa bóleıtin Allaǵa madaq bolsyn! Sondaı-aq Rabbysy eń jaqsy minez-qulyqpen áspettegen hám jaratylystyń qurmettisi Muhammedke, onyń otbasy múshelerine, aqıqat pen bilim ıeleri sanalatyn sahabalaryna Allanyń ıgiligi men sálemi bolsyn!
Osynaý zertteý jumysyn Quran túsken ramazan aıynyń ımanǵa toly aıly túninde bastaǵaly otyrmyn. Bul – hıjranyń 1437 jyly, ramazan aıynyń 17-siniń tańyna qaraǵan tún. Iaǵnı mıládı jyl sanaǵy boıynsha 2016 jyldyń 22-juldyzyna tuspa-tus kelip otyr. Sondyqtan Alladan zııaly tulǵalarymyzǵa materıaldyq jáne rýhanı qoldaý kórsetkenindeı, bizge de sondaı qoldaý kórsetýin suraımyn. Óz kezeginde Alla men elshisine kómek kórsetý hám Islam nuryn jer-jerge taratý isi sahabalarǵa arttaryna kitap jazyp, eńbek qaldyrýǵa múmkindik bermedi. Sondyqtan olardyń fıqh máselelerin, oılaý tásilderin hám senim turǵysyndaǵy máselelerdi túsindiretin jazbalaryn keziktirmeımiz.
Alaıda olar osy atalǵandardy balalary men shákirtterine taratyp, osynaý amanatty keler urpaqqa aýyzba-aýyz rıýaıat etý hám sol amanattyń dánin ekken ǵylym májilisteri arqyly jetkizip otyrdy. Keıinnen tabıǵınderdiń kezeńinde Islam memleketi aıaǵyna myqtap turǵan soń, bilim joly keńinen jaıylyp, Quran saqtalyp jınaldy. Sondaı-aq súnnetti jınaqtap, olardy qabyldaý jáne qabyldamaý tásilderin engizýde tabıǵınderdiń eńbegi óte úlken boldy. Sosyn átbaǵý tabıǵınderden bolǵan úshinshi urpaq kelip Alla elshisiniń súnnetin qorǵaý men jınaqtaýda aǵa býynnyń qyzmetin tolyqtyryp, atalǵan istiń mamandaryna aınaldy. Sondaı-aq olar óz ǵasyrlarynyń bas kezinde ózderinen aldyńǵylarda qyzý talqyǵa túsken dáleldeý men oı-pikir tásilderin engizdi. Kez kelgen ilimniń týyndaýyna belgili bir sebep-saldar túrtki bolady. Óıtkeni ilimder birden paıda bola qoımaıdy. Sondyqtan olardyń týyndaýy qajettilikke qaraı júzege asady. Qarap otyrsaq, Islamnyń birinshi ǵasyry ártúrli kúdikter men kúmándi jaǵdaılardan alys ári fılosofııalyq ilimder áli dúnıege kelmegen bolatyn. Onymen qosa sahabalar men tabıǵınder arasynda senim máselelerinde problemalar týyndamaǵan.
Sonymen qatar Allanyń esim-sıpattary baıandalǵan aıattardyń maǵynasyn qazbalap teksermedi. Kerisinshe, olardyń ustanǵan joly – álgindeı aıattardyń maǵynasyna tereń boılamaı, olardy moıyndaı otyryp, oqyp óte shyǵý bolatyn. Al bireý qandaı da bir bıdǵat shyǵarsa, olar ony dereý bultartpas dáleldermen joıyp otyratyn. Tipti, olardan dinniń ár alýan máselelerine qatysty nusqaýlyqtar kelip jetti deýge de bolady. Óıtkeni Ábý-l-Hasan ál-Ashǵarı men Ábý Mansýr ál-Matýrıdı syndy eki ımam kelip, aqıda ilimi máseleleriniń irgetasyn qalap, dinbuzarlardyń kúmándaryna qarsy turdy hám sol jolda pikirtalasqa túsip, eńbekter jazdy.
materıal ««Áhl-súnnet» degen kimder?» kitabynan alyndy.
